Ultimo incidente: 15 hora pasa | Total desde februari 19, 2009: 36728
Noticia? Jama nos tipline na 569-6305

Minister Ruiz-Maduro: Gobierno no a tuma ningun decision riba ‘sugartax’.

12 dia pasa , 10 di september 2019 17:33

ORANJESTAD – Minister Ruiz-Maduro ta informa e motibonan pakico Gobierno a propone pa bini cu e impuesto aki y alabes e posicion di Gobierno tocante ‘sugartax’.

Situacion financiero di Pais Aruba ta den un situacion precario. Gobierno tin varios gasto grandi di cumpli cune, manera entre otro: 230 miyon na gastonan di interes di e debe di Pais Aruba y tambe tin e gastonan di e proyectonan Public Private Partnership (PPP) . Alabes Gobierno ta haciendo esfuersonan pa baha e gastonan di personal. Hunto cu e gastonan aki tambe Gobierno tin gastonan halto di AZV cu ta sigui aumenta.

Na mes momento Gobierno ta trahando pa busca otro manera pa yega na entradanan necesario.

IMF a haci un investigacion pa Aruba y a brinda conseho riba posibel avenida pa crea entrada pa Gobierno. Den esaki a recomenda cu tin espacio pa introduci un ‘sugartax’.

Gobierno a ricibi informacion di AZV cu ta mustra cu e situacion di salud na Aruba ta alarmante. Tambe Gobierno a ricibi informacion di Oficina Central di Estadistica (CBS) cu e consumo di refresco na Aruba ta hopi halto, 92% di nos poblacion ta bebe refresco, compara cu 8% cu ta bebe juice. Consumo halto di suco por genera varios malesa, manera malesa cardiovascular, diabetis y obesidad.

Den cuadro di e informacionnan aki, Gobierno a traha riba algun proposicion pa locual ta ‘sugartax’. E scenarionan aki a wordo treci dilanti siman pasa den e sessionnan cu diferente gremio pa asina por haya nan opinion y sugerencianan.

Actualmente Gobierno ta den dialogo cu e unico compania cu ta produci refresco na Aruba y ta informa cu ainda ningun decision a wordo tuma. E intencion no ta pa trece un belasting pa perhudica ningun hende of compania.

E mandatario a subraya cu Gobierno no a tuma ningun decision riba locual ta ‘sugartax’.

Gobierno lo brinda informacion na nos pueblo na momento cu cualkier decision importante wordo haci cu ta na bienestar di Pais Aruba.

Tweet
Recommend
Buzz
Boogaard Assurantiën - P'abo Ta Bon Segura!
Maaza - Coconut water and Mango
« BEK

« BEK PA PAGINA PRINCIPAL